[16]
IN VARIOS COMICOS TRAGICOSQUE IOSEPHI CAMERINI FANO FORTUNAE ORIUNDI EVENTUS. AEGIDIUS RASTRIUS CANONICUS LEOD
Nascenti Camerino hospes Fortuna Iosepho,
adfuit, e Fano dona tenella ferens.
Adfuit et Virtus, Musae advenere sorores,
infantem variis condecorare bonis.
Praemia pro donis repetunt, Fortuna, sed prius [5]
ius a cive, sacra poscit ab aede suo.
Scribe meos (inquit) mundi ludibria, lusus,
unicam ut efficiant me tua scripta Deam.
Id risit Virtus, Musae risere sorores,
Fortunae docto iussa peracta dolo. [10]
Nam scribit Camerinus opus vel Apolline dignum,
quo coecam toto monstrat in orbe Deam.